14 سالہ نابینا برٹش پاکستانی گلوکارہ کی شاندار پرفارمنس

14 سالہ نابینا برٹش پاکستانی گلوکارہ سیرین جہانگیر کی کانوں میں رس گھولتی آواز نے ’بریٹنز گاٹ ٹیلنٹ‘ کے سیمی فائنل مقابلے کے ججز کو بھی یہ کہنے پر مجبور کر دیا کہ یہ پرفارمنس جادوئی تھی۔کمسن برٹش پاکستانی نابینا گلوکارہ سیرین جہانگیر نے گزشتہ روز موسیقی کے اس بڑے مقابلے میں اپنی سریلی آواز اور شاندار پرفارمنس کے ذریعہ لاکھوں دل جیت لیے۔سیرین کی بہترین پرفارمنس پر ججوں نے ’منفرد‘، ’جادوئی‘ اور ’خصوصی‘ کے خطابات سے نوازا۔ سیرین جہانگیر نے اس مقابلے کے سیمی فائنل شو میں شرکاء کو مبہوت کرکے رکھ دیا۔ 14سالہ سیرین جہانگیر وزیراعظم عمران خان کے دیرینہ دوست اور برطانیہ اور یورپ میں تجارت وسرمایہ کاری سے متعلق ان کے ترجمان صاحبزادہ جہانگیر کی پوتی ہیں۔’بریٹنز گاٹ ٹیلنٹ‘ کے میزبان اینٹ اورڈیک نے یہ بات نوٹ کی کہ سیرین کی پرفارمنس کے دوران تمام شرکاء پر مکمل سکوت چھایا رہا اور ساتھ جج بھی ان کی پرفارمنس سے مبہوت ہوکر رہ گئے اور یہ سکوت ان کے سیمی فائنل کی پرفارمنس کے اختتام پر اس وقت ٹوٹا جب محفل میں شریک ہر شخص سیرین کے ساتھ رو نے لگا۔پرفارمنس کے اختتام پر سیرین پیانو سے اٹھی اور اس کے والد کفیل جہانگیر اسے اسٹیج کے وسط میں لے کر آئے جہاں ججوں اورشرکاء نے کھڑے ہوکر انھیں ان کی یادگار پرفارمنس پر خود داد دی، ان کی ناقابل فراموش پرفارمنس کی برطانیہ کے مقبول شوز کی تاریخ میں کوئی نظیر نہیں ملتی۔ ججوں نے بھی اس کی پرفارمنس کی تعریف میں کسی بخل سے کام نہیں لیا، ایک جذباتی خاتون امانڈا ہولڈین نیکہا کہ سرین جادوئی ہے، یہ فرشتہ ہے، انتہائی خوبصورت گانا سنایا، میں سمجھتی ہوں کہ تمہارے اندر کوئی منفرد خوبی ہے، میں سمجھتی ہوں کہ تم بہت بلندی پر جاؤ گی۔ آشلے بینجو نے کہا کہ میجیکل یعنی جادوئی بالکل صحیح لفظ ہے، ا?پ نے پیانو کے ساتھ جس طرح اپنی آواز ملائی، ایسا بہت کم لوگ کرپاتے ہیں، آپ کی آواز نے مجھے کہیں اور پہنچا دیا تھا اور جب آپ نے اپنی پرفارمنس ختم کی تو محسوس ہوا کہ میں پھر اپنی کرسی پر آگئی ہوں۔ سیرین کی پرفارمنس پر ڈیوڈ ولیم نے کہا کہ سیرین میں سمجھتا ہوں کہ آپ کے اندر خصوصی ٹیلنٹ موجود ہے اور آپ کو کسی سہارے کی ضرورت نہیں ہے، آپ صرف بیٹھ کر پیانو پر گانا شروع کردیں،لاکھوں افراد خود ہی آپ سے جڑ جائیں گے، میں سمجھتا ہوں کہ یہاں ہم نے یہی کچھ دیکھا ہے، یہ بہت ہی خاص پرفامنس تھی اور آخر میں جب آپ روپڑیں تو میں بھی آپ کیلئے رنجیدہ ہوگیا۔ انہوں نے کہا کہ میں سمجھتا ہوں کہ یہ خوشی کے آنسو تھے، کیونکہ آپ نے حقیقت میں بہت ہی جاندار پرفارمنس کا مظاہرہ کیا ہے۔ الیشا ڈکسن نے اپنے ساتھی ججوں کے فیصلے سے اتفاق کرتے ہوئے کہا کہجج حضرات جو کچھ کہہ چکے ہیں، اس کے بعد اب میرے پاس مزید کچھ کہنے کو نہیں ہے، میں سمجھتی ہوں کہ یہ ایسے لمحات تھے جب آپ کی سانس رک گئی تھی اور ایسا ہمیشہ ہر شو میں نہیں ہوتا، اس میں ایمانداری، تقدس اورسنجیدگی ہے، جو خال خال ہی ملتی ہے اور آپ جانتی ہیں کہ آپ کا کام وہاں بیٹھ کر گانا گانااور ہمیں کچھ محسوس کرنے پر مجبور کرنا ہے۔انہوں نے کہا کہ ہم سب آپ سے اور آپ کے گانے سے جڑ گئے ہیں، اس پرفارمنس کے ذریعے سیرین نے اولین 3 موسیقاروں میجیکل بونز اور ڈانس ٹروپ X1X کریو میں سب سے اوپر اپنی جگہ بنالی ہے تاہم اب انھیں اکتوبر میں گرینڈ فنالے میں بھی حصہ لینا ہے۔