حامیوں کو گرفتار کرنے پر مودی کے بھائی کا لکھنو ایئرپورٹ پر دھرنہ

بھارتی وزیراعظم نریندر مودی کے بھائی نے لکھنو ایئرپورٹ پر اس وقت دھرنہ دیدیا جب پولیس نے دفعہ 144 کی خلاف ورزی پر ان کے حامیوں کو گرفتار کرلیا۔ بتایا جاتا ہے کہ پولیس نے بدھ کو پرہلاد مودی کے حامیوں کو ایئرپورٹ کے ہائی سیکورٹی زون میں جمع ہونے پر گرفتار کیا تھا۔ تاہم اب انھیں رہا کردیا گیا ہے۔ اس سے قبل پرہلاد مودی نے الزام عائد کیا کہ پولیس نے انکا استقبال کرنے کے لیے آنے والے ان کے حامیوں کو گرفتار کیا۔ انکا کہنا تھا کہ آج انھیں الہٰ آباد (پریاگراج) جانا تھا اور یہ پروگرام گزشتہ روز سے جاری تھا۔انکے مطابق یہ اخلاقی طور پر غلط ہوتا کہ میں تو یہاں سے آزادانہ طور پر چلا جاؤں اور میرے حامی جیل میں ہوں، اسی لیے میں نے فیصلہ کیا کہ یہاں بھوک ہڑتال کروں، میں نے کھانا پینا ترک کردیا ہے، اور میں یہاں تا دم مرگ نہیں اٹھوں گا۔ تاہم بعدازاں حکام نے انکے حامیوں کو رہا کردیا۔